آسر ابتسم بامتنان، وسحب الهاتف وقفل المكالمة بعد ما أكد على المحامي يستمر في كل الإجراءات المشددة. قفل آسر الخط، وقرب مني وحضن إيدي بين إيديه بحنان وقال:
— أنا النهاردة بس اتأكدت إن مريم اللي اخترتها وقفت على رجلها بجد، وإن الماضي خلاص اترمى تحت رجلينا وبقى صفحة وانطوت للأبد.
مرت الأيام والأسابيع، وكانت الأحكام القضائية بتنزل على حازم وأمه زي الصواعق. المحكمة قضت بحبس حازم ثلاث سنوات مع الشغل والنفاذ بتهم التزوير وخيانة الأمانة وسرقة أموال القاصر، وحكمت على أمه بالسجن سنة مع الشغل بتهمة الاشتراك والتعدي والسب العلني والتشهير! الشقة الكبيرة رجعت لملكيتي رسمياً، وفلوس شهادة جودي ردت لحسابها بالفوائد والتويضات المادية اللي فرضتها المحكمة عليهم، بينما والد حازم انهار صحياً وتم إلزام العيلة بدفع قيمة الشيكات المتبقية لشركة الأدوية، ليجدوا أنفسهم في الشارع بلا مال ولا كرامة ولا حماية.
في المقابل، حياتي مع آسر كانت بتتغير للأفضل كل يوم. آسر أصر إن جودي تتسجل رسمياً بمدارس دولية راقية، وكان بيعاملها كإنها بنته من صلبه، يخرجها ويهتم بتفاصيل دراستها ولعبها، وجودي بقت تناديه “بابا آسر” بحب وتعلّق شديد. أما في المستشفى، آسر ترقاني وبقت مشرفة على قسم التمريض كاملاً بعد ما كملت دراساتي العليا بدعمه وتشجيعه، وبقت نظرات الاحترام والتقدير هي العنوان الوحيد اللي بشوفه في عيون كل اللي حواليا.
وفي يوم دافئ ومميز، وبعد مرور سنة كاملة على جوازنا.. كنا قاعدين في الفيلا بنحتفل بعيد ميلاد جودي السادس. الفيلا كانت متزينة بأجمل الديكورات، وآسر واقف بيضحك وبيلعب مع جودي، وأمه قاعدة جنبنا بتدعيلي بقلب صافي وهي ماسكة إيدي.
وفي وسط الزيطة والفرحة، حسيت بدوخة خفيفة وتعب مفاجئ.. آسر لاحظ على طول، قرب مني بلهفة وقلق وهو بيسندني:
— مريم! مالك يا حبيبتي؟ وشك أصفر فجأة ليه؟ تعالي استريحي!
ابتسمت بكسوف وهدوء، وسحبت ظرف أبيض من شنطتي واديتهوله في إيده وأنا بهمس في أذنه:
— مفيش داعي للقلق يا دكتور آسر.. دي مجرد أعراض طبيعية جداً للخبر اللي جوه الظرف ده!
آسر فتح الظرف بسرعة، وكانت عينيه بتتحرك بين السطور بذهول وشغف، لحد ما وقفت عينيه على نتيجة التحليل الطبي..
اتسعت عيون آسر بذهول وفرحة عارمة عمري ما شفتها في ملامحه الحادة والصارمة من قبل! النتيجة كانت بتؤكد حملي في الشهر الثاني. آسر شالني من على الأرض ودار بيا في نص الصالة قدام أمه وجودي، والضحكة كانت طالعة من أعماق قلبه وهو بيقول بصوت هز الفيلا:
— الحمد لله والشكر لله! يا أجمل وأعظم عوض في حياتي يا مريم!
والدته زغرطت بفرحة ودموعها نازلة، وجودي جرت علينا وهي بتسقف وتقول ببراءة:
— بابا آسر.. هو أنا هيجيلي بيبي صغير العب معاه؟!
انحنى آسر وجاب جودي في حضنه وحضنّا إحنا الاتنين مع بعض وهو بيهمس:
— أحلى بيبي في الدنيا يا جودي، وهيكون عنده أعظم وأحنّ أخت وأم في العالم.
مرت الشهور بحب وأمان واستقرار، وآسر كان بيحيطني برعايته واهتمامه في كل لحظة. وبعد تسعة أشهر، وضعت طفلنا الأول.. ولد جميل وملامحه تشبه آسر تماماً، وسميناه “ياسين”.
في يوم سبوع “ياسين”، كانت الفيلا مليانة بالمهنئين والأطباء والأهل والأصدقاء، والكل بيشهد على حجم الحب والعز والأمان اللي عايشة فيه. وخلال الحفل، المحامي الخاص بآسر استأذن ودخل سلم عليا وباركي، واداني خبر أخير عن حازم وأمه..
قال المحامي بصوت خفيض:
— حبيت أطمنك يا مدام مريم.. حازم وأمه خرجوا من السجن الأسبوع اللي فات بعد انتهاء مدتهم، بس خرجوا للشارع، بيوتهم اتباعت وممتلكاتهم راحت لسداد الديون والشيكات والقضايا، وحازم شغال حالياً بائع متجول ومش لاقي قوته، وأمه قاعدة في أوضة إيجار بائسة، وكل ما حد يجيب سيرتك قدامهم، بيتحسروا وبيموتوا بغلهم من العز والرفعة اللي ربنا كرمك بيها.
سمعت الكلام، ونظرت لآسر وهو شايل ابننا ياسين وبيضحك مع جودي، وحسيت بغيمة سوداء ثقيلة انزاحت عن صدري للأبد. ما حسيتش بأي تشفي أو انتقام، لكن حسيت بعدل ربنا العظيم.. العدل اللي بيطيح بالمستكبرين ويرفع الصابرين.
وقفت جنب زوجي وحبيبي وسندي، ومسكت إيده بثبات وقوة، وبصيت في عينيه وقلت بصوت مليان يقين:
— أنا زمان كنت فاكرة إن حياتي انتهت يوم طلاقي وإهانتي.. بس اكتشفت إن ربنا كان بيبعدني عن الباطل عشان يهديني لأجمل حقيقة وأعظم عوض في الدنيا.. شكراً لأنك كنت الراجل اللي رجّعلي كرامتي ورجّعلي الحياة.
آسر بصلي بابتسامة حنونة وقبل جبينها قدام الكل وقال:
— أنتِ اللي أنرتِ حياتي يا مريم.. والفضل لربنا اللي جمعنا في اللحظة اللي كنا محتاجين فيها بعض.
وعشنا من يومها في حب وأمان، وكتبنا نهاية قصة كانت بدايتها ألم وكسرة، ونهايتها عز وعوض وكرامة لا تزول
