
رفعت راسي وقلت بنبرة هادية أوي، أهدى من ريح الفجر:
«أنا غيرت رأيي يا أبو فادي».
شال إيده من على وشه بلهفة، عينه كان فيها أمل غبي إنه يلاقي في كلامي رجعة ولا تسامح، فسأل بصوت مخنوق ومكسور:
«غيرتي رأيك في إيه يا حنان؟ قولي اللي يرضيكي وأنا هعمله.. وحياة ولادنا ما هتشوفي وش عزة تاني، ولا كلمة هتطلع إلا بإذنك، البيت ده كله تحت أمرك».
ضحكت.. ضحكة خفيفة طلعت من غير غل، ضحكة الواحدة اللي شافت الباب مفتوح قدامها وقررت تخرج للنور:
«غيرت رأيي في إني أعيشك خدام لكرامتي.. أصل الخدامين بنقرف منهم لما بنعرف أصلهم. أنا كنت فاكرة إني لما أذلك وأكسرك هبرد ناري، بس لما بصيت في وشك دلوقتي لقيت إني بقرف منك، بقرف من راجل كان باصص لحرمة أخوه ومستقوي بيها على أم عياله. أنت قولتلي زمان: ‘قعادك هنا بأمر عزة’.. وأنا بقى بقولك: ‘خروجي من حياتك بأمري أنا’».
وقف مفزوع، عينه وسعت، والدم اللي كان هارب من وشه رجع في ثانية من الرعب:
«يعني إيه يا حنان؟ هتخربي بيتنا بعد العمر ده كله؟!».
«البيت ده اتخرب يوم ما دخلت عزة فيه وشاركتني فيك وفي قرشك وفي ولادي وأنت بتضحك ومبسوط.. اتخرب يوم ما جيت قولتلي في وشي إنك اتدبست فيا ومبملاش عينك بربع جنيه، ومطلعتش راجل صان بيته ولا صان حرمة أخوه الميت. من اللحظة دي.. تطلقني بالمعروف، وبكل ورقة وقرش يخصني ويخص ولادي».
اتجنن، صوته علي بتهتهة:
«أطلقك؟! وعيالي؟! هتاخدي عيالي وتسيبيني؟!».
شخّطت فيه شخطة خلت عروقه تنتفض، وقفت قدامه وبصيت في عينه من مسافة شبر:
«العيال مكانهم في حضن أمهم اللي صايناهم، مش في حضن راجل مسلوب الإرادة كان بيخليهم يوطوا راسهم ويتحايلوا على مرات عمهم عشان كشكول! هتطلق، وهتسيب شقة الحضانة ليا ولولادي، وهتدفع نفقتهم مليم ينطح مليم غصب عنك مش بكرمك، يا إما زي ما قولتلك.. كشف الحساب الأصلي اللي يفضح حكاية التلاعب في مال القُصّر يروح لمحكمة الأسرة ولأهلك الصبح، ووقتها هتخسر ولادك، وهتخسر شرفك، وهتلبس البدلة الزرقا بتهمة خيانة الأمانة مع ست الحسن والتدبير!».
نزل على ركبه، وشه اتلون بذل ملوش آخر، ولسانه مكنش قادر يجمع جملة مفيدة. بصلي بترجي زي الشحات:
«بلاش المحاكم يا حنان.. بلاش الفضايح أبوس إيدك، عشان خاطر اللي كان بينا».
«اللي كان بينا أنت دبحته يوم ما وقفت هي تطبطب على كتفك وأنت بتطردني بشنطة هدومي. بكرة الصبح تكون المأذون مستنيك، ورقتك توصلي لحد عندي نظيفة، والشقة تفضى من هدومك قبل العصر».
سبته مكانه راكع في الأرض، ودخلت أوضتي، لميت كل هدومه وحطيتها في الشنطة اللي كان ناوي يرميني بيها، ورزعتها في الصالة قدام رجليه.
الصبح طلع، وكانت الشمس داخلة البيت لأول مرة تحسسني بالدفا، دفا الست اللي عرفت تاخد حقها تالت ومتلت، كسرت غريمها، وفضحت الحية، وخرجت من الحكاية دي وهي مالكة أمرها، مش مكسورة الجناح ولا محنية الضهر.. ست قوية سابت القمامة وراها ومشت لقدام.
الساعة مجاتش اتناشر الضهر إلا وكان القلم بيجري على دفاتر المأذون، تكة القلم على الورق كانت بتطرب وداني كأنها مزيكة نصر، وهو قاعد قصادي مدلدل راسه في الأرض، عينه مفيهاش حتى الجرأة إنه يرفعها في عيني. وقع ومضى وبصم على مؤخري وعلى نفقة العيال، وتنازل رسمي عن شقة الحضانة لحد ما أصغر عيل يبلغ أشده، كل ده وهو ساكت ومكتوم، خايف من الورقة اللي في جيبي أكتر ما خايف من ربه.
خرجت من عند المأذون وخطوتي في الشارع غير أي خطوة مشيتها في عمري كله. كانت الأرض شيلاني، والهوا اللي بيدخل صدري صافي ونضيف، مفيش فيه خنقة المطبخ ولا ريحة السم اللي كانت عزة بتبخه في كل ركن.
وصلت البيت، لقيت العمارة هادية بس عيون الجيران من ورا الشيش بتاكل السلالم. عزة كانت قافلة بابها بالضبة والمفتاح، حابسة روحها جوة بعد الفضيحة اللي أكلت وشها قدام حمايا وإخوات جوزها المرحوم، الأرملة اللي كانت سايقة الهبل على الشيطنة بقت سيرتها على كل لسان، وكبار العيلة عينهم بقت على الدفاتر وعلى كل مليم داخل وخارج من شقتها، اتجردت من الهيبة المضروبة، ورجعت لحجمها الطبيعي.. واحدة طماعة اتمسكت بإيدها متلبسة.
طلعت شقتي، دخلت ولقيت أبو فادي بيلم آخر كراكيبه في شنطة سفره، وشه مخطوف كأنه طالع من مقبرة. وقف على باب الشقة وتردد ثانية، بصلي بنظرة كلها حسرة وندم، وقال بصوت واطي مهزوز:
«هانت عليكي العشرة يا حنان؟ هان عليكي تكسريني وتطرديني من بيتي قدام الدنيا كلها عشان غلطة؟ ده أنا سترتك وعيشتك سنين!».


